ខេត្តបាត់ដំបង,ស្រុកកំរៀង
កម្លាំងកងរាជអាវុធហត្ថស្រុកកំរៀងធ្វើការឃាត់ខ្លួន
បុរសម្នាក់ដែលជាអ្នកបាញ់បោះសេរីភ្លាមៗ ក្រោយពីបានធ្វើសកម្មភាព ដកកាំភ្លើងខ្លីវាយក្បាលនិងបាញ់គំរាមជាច្រេីនគ្រាប់ទៅលេីបុរសម្នាក់បណ្តាលអោយរងរបួសត្រង់ស្មាខាងស្តាំ។ បេីយោងតាមប្រភពព័ត៌មានពីកន្លែងកើតហេតុបានបញ្ជាក់ថា ហេតុការណ៍នេះបានកើតឡើង នៅថ្ងៃទី២៤ ខែតុលា ឆ្នាំ២០២១ វេលាម៉ោង ២ រំលងអាធ្រាត្រ ត្រង់ចំណុច ឃុំបឹងរាំង ស្រុកកំរៀង ខេត្តបាត់ដំបង ដោយមានការជួបជុំផឹកស៊ី រហូតឈានដល់ទំនាស់នូវពាក្យសម្តី ទើបមានការប្រតាយប្រតប់គ្នា រវាងជនរងគ្រោះ
ឈ្មោះ រ៉ុម ចន្ថា ភេទប្រុស អាយុ ២៥ ឆ្នាំ មុខរបរយោធា រស់នៅភូមិអូរដារលើ ឃុំបឹងរាំង ស្រុកកំរៀង ខេត្តបាត់ដំបង ហើយជនបង្កបានដកកាំភ្លើងវាយទៅលើក្បាលជនរងគ្រោះ ព្រមទាំងបានបាញ់ចំនួន ៥ គ្រាប់ បណ្តាលអោយត្រូវស្មាខាងស្តាំ១គ្រាប់ធ្លាយ។ភ្លាមៗនោះដែរ កម្លាំងប៉េអឹម ស្រុកកំរៀង បានចុះឃាត់ខ្លួន ជនសង្ស័យដែលជាខ្មាន់កាំភ្លើងម្នាក់ ឈ្មោះ ឆាយ សេរីបុត្រ ភេទប្រុស អាយុ៣០ឆ្នាំ មុខរបរជាមន្ត្រីអង្គភាពប្រឆាំងអំពើពុករលួយ ( ACU ) រស់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ការឃាត់ខ្លួនមន្ត្រីអង្គភាពប្រឆាំងអំពើពុករលួយខាងលើនេះ ដោយយោងតាមបណ្ដឹងរបស់ជនរងគ្រោះ ដែលបានប្ដឹងចោទប្រកាន់ថា ខ្មាន់កាំភ្លើងរូបនេះ បានដកកាំភ្លើងខ្លីវាយក្បាលខ្លួន ហើយថែមទាំងបាញ់គំរាមទៀតផង។ ដោយអំពើហិង្សាដ៏ឃោឃៅរវាងខ្លួនជាមួយឈ្មោះឆាយ សេរីបុត្រ នេះគឺផ្ដើមចេញពី«ជម្លោះពាក្យសំដីនៅក្នុងវង់ផឹកស៊ី» ដោយសមត្ថកិច្ចបានចោទប្រកាន់ ពីបទ«ប៉ុនប៉ងឃាតកម្ម»។បច្ចុប្បន្នបើតាមការសាកសួរពីប្រភពមួយចំនួនគឺជនសង្ស័យអាចបញ្ជូនខ្លួនមកកាន់ទីបញ្ជាការដ្ឋានកងរាជអាវុធហត្ថខេត្តបាត់ដំបងហើយ ប៉ុន្តែសារព័ត៌មានបានទូរស័ព្ទទៅសាកសួរលោកមុយ សាលិត មេបញ្ជាការប៉េអឹមស្រុកកំរៀង គឺលោកបានឆ្លើយថា សួរទៅខេត្តបាត់ដំបងទៅលោកមិនបានដឹងរឿងអ្វីទាំងអស់៕