ខេត្តបន្ទាយមានជ័យ៖នៅព្រឹកថ្ងៃព្រហស្បតិ៍ ៤រោច ខែពិសាខ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែឧសភា ឆ្នាំ២០២២នេះ ឯកឧត្តម ប៉ាន់ខែម ប៊ុនថន សមាជិកគណៈកម្មាធិការកណ្តាល គណបក្សប្រជាជនកម្ពុជា បានអញ្ជើញសំណេះសំណាលជាមួយក្រុមគ្រួសារគណបក្សប្រជាជនកម្ពុជា ៥ពាន់គ្រួសារ ក្នុងឃុំទួលពង្រ ស្រុកម៉ាឡៃ ខេត្តបន្ទាយមានជ័យ។

ពិធីនេះក៏មានការចូលរួមពីសំណាក់ឯកឧត្តម សុខ ភាព សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងាររាជរដ្ឋាភិបាលចុះជួយស្រុកម៉ាឡៃ ឯកឧត្តម ង៉ោ ម៉េងជ្រួន សមាជិកអចិន្ត្រៃយ៍គណបក្សខេត្ត និងជាប្រធានក្រុមការងារខេត្តចុះជួយស្រុកម៉ាឡៃ លោក ស្វាយ ជា ប្រធានគណៈកម្មាធិការគណបក្សស្រុកម៉ាឡៃ លោកជំទាវ ប៉ាង ណាគ្រី អគ្គនាយិកាក្រុមហ៊ុន ប៉ាង ណាគ្រី រៀលអ៊ីស្ទេត ឯ.ក ឯកឧត្តម ឌៀង សារ៉ាន់ អនុប្រធានគណៈកម្មាធិការគណបក្សមូលដ្ឋានគ៩៨ លោក យ៉ាង គឹមហ៊ុយ អនុប្រធានប្រចាំការតំបន់អភិវឌ្ឍន៍ភូមិបឹងជង្រុកតេជោឈ្នះឈ្នះ និងលោក រ៉េត រ៉ន ប្រធានប្រតិបត្តិសម្ពន្ធយុវជនស្រលាញ់សន្តិភាព ខេត្តបន្ទាយមានជ័យ ព្រមទាំងសមាជិក សមាជិកគណបក្សប្រជាជនកម្ពុជា ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។

ឯកឧត្តម ប៉ាន់ខែម ប៊ុនថន សមាជិកគណៈកម្មាធិការកណ្តាលគណបក្សប្រជាជនកម្ពុជា បានលើកឡើងអំពីវីរភាពដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា ដែលបាននាំយកសន្តិភាពពេញបរិបូរណ៍មកជូនជាតិ និងប្រជាជនកម្ពុជា ឱ្យបានរស់នៅប្រកបដោយភាពសុខុដុមក្រោមម្លប់សន្តិភាព និងការអភិវឌ្ឍន៍ពិតប្រាកដ។

ក្នុងពិធីនោះ លោកជំទាវ ប៉ាង ណាគ្រី អគ្គនាយិកាក្រុមហ៊ុន ប៉ាង ណាគ្រី រៀលអ៊ីស្ទេត ឯ.ក បានឧបត្ថម្ភអង្ករចំនួន១០០តោន សម្រាប់ចែកជូនបងប្អូនគ្រួសារគណបក្សប្រជាជនកម្ពុជា ឃុំទួលពង្រ ស្រុកម៉ាឡៃ ៥ពាន់គ្រួសារ ដោយ១គ្រួសារទទួលបានអង្ករ២០គីឡូក្រាម៕